Ыстамбұлда баратын жер жетеді: жай аралап жүріп те біраз нәрсе көруге болады. Түркияда Museum Pass картасын сатып алып, бес күн бойы бірнеше музейге тегін кіре аласыз.

Museum Pass картасымен кіруге болатын музейлер:

• Мозаика музейі,
• Галата Мевлеви,
• Рүмелі Хисар қамалы,
• Ислам ғылымы мен технологиялары тарихы музейі,
• Археология музейі,
• Әулие Ирина шіркеуі,
• Топқапы сарайы,
• Топқапы харемі,
• Ислам және түрік өнері музейі.

Қалған музейлерге бөлек билет алып кіресіз. Кейбір тарихи ескерткіш қазір мешіт ретінде қолданылады, мысалы, Ахмет сұлтан мешіті немесе Айя София.

Мұнда бәрін табуға болады — брендтік киімдер, антиквариат, тоқыма бұйымдары, асыл металл бұйымдары, көтерме тауарлар.

Сауда аудандары:

• Османбей — киім-кешек пен тоқыма бұйымдарын сату бойынша қаладағы ең танымал аудандардың бірі.
• Лалели — сыртқы киімдерді, аяқ киімдерді көп әрі арзан сатып ала аласыздар.
• Зейтинбурну — таза былғарыдан жасалған бұйымдарды тікелей зауыттан тапсырыс беруге болады.
• Нишанташи — бұл ауданға қымбат, жоғары сапалы бренд тауарлары мен зергерлік бұйымдарды алуға келеді.
• Истикляль көшесі — жергілікті өнімдер де, жаппай нарық дүкендері де бар: Mango, Bershka, Zara, New Balance, Koton, DeFacto, OXXO, Kiki Riki, Gratis, Flormar, Pandora.
• ірі сауда орталықтары — Istinye Park, Kanyon, Zorlu Center, Cevahir, Akasya, EMAAR Square Mall, Venezia Mega Outlet, Metropol İstanbul.
• Гранд Базар — дүниежүзіндегі ең үлкен базарлар қатарына да кіреді, оның аумағында базарлық, әшекей бұйым, сөмке, киім-кешек дүкендері ғана емес, қонақүйлер, мешіт, дәмханалар, мейрамханалар, субұрқақ пен зират та бар.
• Мысыр базары — тамаққа керектің бәрі бар: сирек кезігетін дәмдеуіштер, келілеп сатылатын шайлар, қақталған жемістер, жаңғақтар мен зәйтүндер, қолдан жасалған сабын мен локумның түр-түрі, киім-кешек, әшекей бұйымдар мен кілемдер.

Түркияның ерекше тағамдары туристердің жыл сайын осында оралуының бір себебі болып табылады.

Туристер Түркияға барғанда стритфуд жемей қайтпайды. Сондықтан стритфуд туралы айтамыз.

Балық экмек — көкөніс қосылған балық сендуич. Нанның арасына туна я скумбрия салынады. Балық экмекті көбіне теңіз жағалауынан табуға болады. Мысалы, Ыстамбұлдағы Эминөнү айлағынан.

Бөрек — қатпарлы қамырдан жасалған, түрлі салмасы бар тамақ. Мысалы, арасына шпинат, ірімшік, ет, картоп пюресі салынады.

Күмпір — түрлі салмасы бар картоп. Мысалы, оған май мен чеддер ірімшігі салынады. Күмпір көбіне Істіклял мен Ортакөйде сатылады.

Симит — күнжіт себілген тоқаш. Түркияның әр түкпірінен табуға болатын нан өнімі. Көбіне теңіз жағалауында сатылады, шай ішкенде керемет десерт болатын нан.

Хамамы — түрік мәдениетінің ажырамас бөлігі. Түрік моншаларында суға түсіп қана қоймай, массаж, пилиң жасата аласыз.

Ыстамбұлда 500 астам хамам бар, онда күн сайын жүздеген массаж терапевттері 1000 клиентке дейін қабылдайды. Хамамдар бағасымен, көлемімен, танымалдылығымен және тарихи маңыздылығымен ерекшеленеді.

Саяхатшылар Бейоғлыдағы Галатасарай хамамын көп мақтайды. Одан бөлек, Шемберліташ, Сүлеймание мен Айя Софиядағы Хүррем сұлтан хамамы бар. Хүррем сұлтан моншасында келгендерге жібек орамал беріледі, ал гигиеналық заттары ақ қаңбақтан жасалады екен. Хүррем сұлтан да осы өсімдіктен жасалған сұйықтықтарды жақсы көрген.